Identiteti shqiptar dhe identiteti kosovar

“Plani i Ahtisarit sipas mendimit tim është projekti i një shteti që formon kombin.”
“Ky është pragmatizmi i një klase politike, e cila historikisht, siç thashë, ka ardhur në pushtet nëpërmjet të huajve.”

Intervistë e Fatos Lubonjës botuar në gazetën kosovare “Epoka e re”. Intervistoi Dritan Dragusha.
-Më 17 shkurt 2008 është shpallur Kosova shtet i pavarur bashkë me rezolutën 1244, me pakon e Ahtisarit, pa ushtri, policinë nuk e kontrollon vetë, por dhe nuk e kontrollon një pjesë të territorit të vet. A mund ta quajmë këtë pavarësi sipas jush?

“Sigurisht që nuk është pavarësi. Në rastin më të mirë është pavarësi nga Serbia, nëse është. Gjykimi im për këtë situatë është se nuk jemi në një proces të përcaktuar qartazi, prerazi, vijëdrejtë, përkundrazi mjaft kontradiktor. Them kontradiktor në dy aspekte që duhen dalluar njëri nga tjetri. Njëri është procesi i kushtëzuar nga ndërkombëtarët, që marrin pjesë në proces me gjithë aktorët e vet, ndërsa tjetri është konteksti brenda Kosovës, ku ka edhe atje aktorë të ndryshëm, të cilët edhe ata janë në proces. Dhe po t’i shohësh të dyja palët, edhe ndërkombëtarët, edhe shqiptarët brenda, ku duhet të përfshijmë edhe pakicat e tjera, kanë kontradiktat e veta në këtë proces. Gjendja e Kosovës për sa i përket statusit të saj është pikërisht, për mendimin tim, shprehje e të gjitha këtyre kontradiktave. Më konkretisht, kur flas për ndërkombëtarët dhe kontradiktat mes tyre, kam parasysh: kontradiktat në një nivel gjeopolitiko-strategjik, ku mund të përmendja Rusinë me njërin krah që ka mbrojtur Serbinë dhe është kundër pavarësisë, me pjesën kryesore të Perëndimit me në krye SHBA-të që e mbështet. Por është edhe kontradikta që ka vetë Perëndimi brenda vetes në këto çështje. Disa shtete që kanë probleme të ngjashme, si Spanja dhe vende të tjera janë kundër. Po ashtu mendoj se ka edhe një kontradiktë tjetër, që nuk duhet harruar, që lidhet me pyetjen se ku po shkon Evropa. Ajo vetë është ngërthyer në kontradiktat midis atij që mund ta quajmë projekti i Evropës së Bashkuar, kozmopolite mënjanë dhe prirjet nacionaliste brenda shteteve të saj në anën tjetër. Edhe kjo është një kontradiktë e pazgjidhur. Padyshim që të gjitha këto reflektohen edhe në Kosovë, me një situatë paqartësie, siç e përshkruat edhe ju që jetoni atje çdo ditë. Nga ana tjetër, mendoj që edhe aktorët shqiptarë nuk është se janë të gjithë bashkuar në këtë proces. Ndoshta i bashkon të gjithë ideja e pavarësisë, por nga ana tjetër shoh se kanë shumë kontradikta midis tyre. Po ashtu ,raporti i politikanëve shqiptarë me ndërkombëtarët nga njëra anë dhe bashkatdhetarët nga ana tjetër ngërthen brenda një kontradikte tjetër të fortë për mendimin tim. Ç’kuptoj me këtë? Kuptoj që ata duhet të përdorin dy gjuhë, dy kode. Njëra është gjuha që lidhet me projektin ndërkombëtar, Planin e Ahtisarit, që dukej qartë, p.sh., në fjalën që mbajti ditën e pavarësisë Thaçi, apo që u shfaq në flamurin që u valëvit në Parlament si flamur i Kosovës, ndërsa tjetra është gjuha nacionaliste me shqiptarët, në kuptimin e gjuhës së aspiratave të shqiptarëve që kanë qenë aspirata të ndërtimit të shtetit të tyre komb. Edhe në këtë të fundit përsëri, nëse i hyjmë edhe më thellë kontradiktave midis shqiptarëve, do të dallojmë një projekt për një Kosovë të pavarur, shtet më vete, dhe një projekt për bashkim me Shqipërinë. Të gjitha këto që numërova e bëjnë situatën dhe këtë proces mjaft të paqartë e aspak vijëdrejtë”.

Read Full Post »

Emrat e ambasadorëve të parë të Kosovës

Avni Spahiu, aktualisht drejtor i Radio Kosovës, ambasador në Washington.

Sylejman Gashi, korrespondent i RTK-së në New York, ambasador në New York.

Muhamedin Kullashi, profesor në Universitetin e Parisit, ambasador në Paris.

Muhamet Hamiti, ish zëdhënës i Ibrahim Rugovës dhe tani këshilltar i Fatmir Sejdiut, ambasador në Londër.

Vilson Mirdita, punonjës kërkimor pranë Universitetit të Hohenheim-it, ambasador në Berlin

Albert Prenkaj, profesor dhe ish punonjës i OSBE-së, ambasador në Romë

Ilir Dugolli, analist në KIPRED dhe ish-këshilltar i kryeministrit Bajram Rexhepi, ambasador në Bruksel

Naim Mala, ambasador në Bernë

Gazmend Pula, drejtues i Komitetit të Helsinkut në Kosovë, ambasador në Tiranë

Sabri Kiçmari, anëtar i Kryesisë së Partisë Demokratike të Kosovës dhe ish emigrant në Gjermani, ambasador në Vjenë

Bekim Sejdiu, këshilltar politik i Ministrit të Punëve të Jashtme të Republikës së Kosovës, ambasador në Ankara.

Molla e Kuqe

Read Full Post »

70 % e UNMIK-ut do të largohen nga Kosova

Shefi i UNMIK-ut, Lamberto Zannier UNMIK-u thotë se do të ruajë rreth 30 përqind të numrit të punonjësve Misioni i Kombeve të Bashkuara në Kosovë paralajmëron se brenda pak ditësh do të fillojë largimin e 70 përqind të personelit. Kjo masë është pjesë e planit për ristrukurimin e UNMIK-ut, pas shpalljes së pavarësisë dhe hyrjes në fuqi të Kushtetutës së Kosovës.

Kombet e Bashkuara po planifikojnë të mbajnë në Kosovë rreth 30 përqind të personelit ndërkombëtar dhe vendor, apo rreth 600 zyrtarë, të cilët do të jenë pjesë e misionit të rikonfiguruar të UNMIK-ut. Afër 1400 zyrtarë të tjerë do të humbin shumë shpejt vendet e punës.

Zvogëlimi i personelit të Misionit të Kombeve të Bashkuara në Kosovë mund të fillojë këtë javë, ndonëse zyrtarë të UNMIK-ut nuk kanë konfirmuar ende datën e saktë.

“Nuk mund t’ua them datën e saktë, por në ditët e ardhshme ne do të fillojmë zvogëlimin e personelit ndërkombëtar dhe atij vendor, siç parashihet me planin për rikonfigurimin e UNMIK-ut”, tha për BBC-në zëdhënësi i UNMIK-ut, Alexander Ivanko.

Read Full Post »

Sipas mediave serbe Kosova është fajtore për konfliktin mes Rusisë dhe Gjeorgjisë

Edhe sot kanë vazhduar luftimet midis forcave ruse dhe atyre gjeorgjiane brenda territorit të Gjeorgjisë.

Përveç se kanë raportuar se aleati i tyre i madh po shënon sukses në luftimet kundër gjeorgjianëve mbi provincat e Abkhazisë dhe Osetisë Jugore, mediat serbe kanë filluar ta përdorin këtë konflikt të armatosur kundër pavarësisë së Kosovës.

B92, një shtëpi mediale nga Beogradi me pronarë disa organizata të huaja që ndihmojnë fjalën e lirë, sot ka publikuar një artikull që përmbledh se ç’far shkruajnë gazetat polake për konfliktin mes Gjeorgjisë dhe Rusisë, dhe jo rastësisht faji për këtë konflikt i lihet Kosovës.

Sipas B92, gazetat polake shkruajnë se sulmet ruse kundër armatës gjeorgjiane janë përgjigjja e Rusisë kundër Perëndimit për përkrahjen dhe njohjen pavarësinë e Kosovës.

Në këtë artikull edhe janë përfshirë disa deklarata të liderit antikomunist, Lech Wales, ku ai kritikon lidershipin polak për njohjen e pavarësisë së Kosovës.

Molla e Kuqe

Read Full Post »

A po sjell rezultate lobimi i Qeverisë së Kosovës?

Sipas ekspertëve dhe opozitës, lobimi i Qeverisë së Kosovës për njohjen e pavarësisë së Kosovës ka dështuar.

Tani kur kanë kaluar gati gashtë muaj, vetëm 45 shtete e kanë njohur pavarësinë e Kosovës që u shpall me 17. shkurt nga Kuvendi i Kosovës. Atë kohë Thaçi theksonte se Kosova brenda një kohe të shkurtër do të njihej nga së paku 100 shtete, por tani 6 muaj më vonë kjo nuk ka ndodhur dhe gazetat dhe analistët kanë filluar të kërkojnë përgjigjeje. Thaçi dhe qeveria e tij tani tregohen më të kujdesshëm kur është në pyetje numri i shteteve që do ta njohin Kosovën por vazhdojnë të premtojnë se njohje të reja do te vinë por pa përmendur afate, emër shtetesh apo periudha kohore.

Sipas ekspertëve që janë prononcuar për Kohën Ditore, asnjë nga njohjet deri më tani nuk është meritë e lobimit të Qeverisë së Kosovës. Të gjitha njohjet janë merita të miqve të Kosovës (ShBA-ve, Britanisë së Madhe etje).

Derisa lobimi i qeverisë së Kosovës nuk ka dhënë frute, lobimi serb i kryesuar nga ministri i jashtëm, Vuk Jeremiq, ka qenë mjaft i suksesshëm, edhe pse Serbia ka pasur zgjedhje pas pavarësisë së Kosovës dhe diplomacia serbe nuk ka funksionuar ashtu siç duhet për disa muaj.

Vuk Jeremiq, Ministër i Jashtëm serb në dy qeveritë e fundit dhe i shkolluar në universitetin prestigjioz të Harvardit, prej shpalljes të pavarësisë ka zhvilluar disa turne pothuajse në të gjithë botën ku ka bërë thirrje që pavarësia e Kosovës të mos njihet. Bisedat e tij me homolog kryesisht nga Azia, Lindja e Mesme, Afrika dhe Amerika Latine kanë rezultuar që hovi i madh i njohjeve që filloi fill pas shpalljes së pavarësisë të ndalet kështu që Kosova të mos arrij njohjet kuantitative (sa më shumë shtete që është e mundur) , për dallim nga ato kualitative (shtetet e rëndësishme) që tani janë realitet.

Shkaqet se pse ka dështuar lobimi i qeverisë së Kosovës janë të shumta dhe jo të gjitha lidhen me vetë këtë qeveri.

Një shkak që vihet në pah nga ekspertet dhe opozita është mungesa e një trupi diplomatik. Serbët që janë shtet tani e shumë vite dhe që kanë trashëguar pothuajse të gjithë shërbimin diplomatik të Jugosllavisë, e kanë më të lehtë të depërtojnë tek organizmat e ndryshme. Kosova në ato shtete ku nuk është e njohur si e pavarur nuk trajtohet si palë e barabartë. Kosova gjithashtu nuk ka ende ambasada.

Një shkak tjetër është e ngadalësia e qeverisë për të filluar edhe atë lobim të kufizuar që u iniciua pas shpalljes së pavarësisë. Qeveria kishte premtime dhe ishte e bindur se nuk ishte e nevojshme me lobim për të marr njohjet por nuk doli ashtu siç qeveria mendonte dhe kur kjo u pa, qeveria e Thaçit filloi një ofensivë në disa vende por kjo erdhi vonë, shumë javë, ne disa raste edhe muaj pas ofensivës së qeverisë së Serbisë.

Burime të ndryshme bëjnë të ditur se shpallja e pavarësisë ishte e planifikuar të ndodhte në vitin 2007 por pas disa mëdyshjeve nga disa shtet kjo u shtye edhe për disa muaj. Për fat të keq të Kosovës, mbështetja ndërkombëtare për pavarësi ishte më e madhe në vitin 2007 sesa në vitin 2008 kur edhe ndodhi pavarësi.

Shumë pak kanë pritur një hezitim kaq të madh të vendeve arabe dhe atyre me shumicë myslimane. Të gjithë kanë qenë të bindur se nuk do të jetë e vështirë për të marrë njohje nga vendet myslimane por kjo ka dal një pavërtetë. Me përjashtim të Turqisë, Afganistanit dhe Senegalit, asnjë shtet tjetër mysliman nuk e ka njohur Kosovën si shtet të pavarur. Serbia po vazhdon lobimin në shtetet myslimane. Gjatë një takimi me homologun e tij egjiptian, Jeremiq ka kërkuar nga ky dhe shtetet arabe që të mbështesin iniciativën serbe në Gjykatën Ndërkombëtare për ta shpallur pavarësinë e Kosovës në kundërshtim me të drejtën ndërkombëtare.

Në qarqet e ndryshme në Kosovë ka edhe një bindje të thellë se Ministri i Jashtëm i Kosovës, Skënder Hyseni, nuk është njeriu i duhur në këtë post. Mendohet se Hyseni nuk e ka marrë postin e ministrit për shkak të aftësive por për shkak të pozitës që kishte në Lidhjen Demokratike të Kosovës (LDK) para dhe pas vdekjes së Ibrahim Rugovës. Edhe pse shumë pak e thonë publikisht, kjo bindje mbizotëron edhe në mesin e popullatës. Bindja përforcohet edhe nga raportet e ndryshme që tregojnë mungesën e rezultateve nga Ministria e Jashtme gjatë atyre muajve që ka ekzistuar.

Prej që Hyseni është bërë ministër ka zhvilluar shumë pak takime me homologët e tij. Edhe me homologët nga shtetet që e kanë njohur Kosovën, ka pasur shumë pak takime.

Sipas Kohës Ditore, edhe në shtypin kosovar ka më shume lajme për vizitat e Jeremiq se sa vizitat e Hysenit. Kjo e brengos Ibrahim Gashin nga Aleanca Kosova e Re që mendon do të duhej të ishte e kundërta dhe akuzon Hysenin se është pasiv dhe nuk po ve në funksion të lobimit të gjitha potencialet.
Edhe Avni Arifi, anëtar i kryesisë së AAK-së, kritikon qeverinë e Kosovës. Sipas tij diplomacia kosovare ekziston vetëm në letër. Ai mendon se një investim më i madh në lobim do të kishte dhënë njohje nga së paku 80 shtete.

“Qeveria e jonë krenohet që ka ngrënë tri darka më pak dhe se shpenzimet për telefona i kanë 18 % më pak, kur dihet se çmimet e telefonisë gati janë përgjysmuar si pasoj e konkurrencës” thotë Arifi.

Përgjigjja e këshilltares për media pranë Ministrisë së Punëve të Jashtme për kritikat që vinë nga opozita për punën e kësaj ministrie është:

“Sa i përket punës që po bën MPJ dhe ministri Hyseni, mund të konstatojmë se po bëhet më e mira në kushtet në të cilat operon MPJ”

“Më duhet të sjell në kujtesë se MPJ është ende në fillet e saj, me një strukturë ende në formim e sipër, e pakompletuar në staf civil, pa objekt që i përmbush nevojat dhe reputacionin e saj.”

Molla e Kuqe
Koha Ditore

Read Full Post »

Pasaportat e Republikës se Kosovës, në duar të qytetarëve prej 21 korrikut

Pasaportat e Republikës së Kosovës janë duke u prodhuar në Lajpcig të Gjermanisë dhe i plotësojnë të gjitha standardet evropiane. Dizajni dhe të dhënat personale janë bërë me teknologjinë me të përsosur dhe është e pamundur të falsifikohen. Kjo pasaportë i plotëson të gjitha rekomandimet e organizatës ndërkombëtar të avicionit civil dhe të Bashkimit Evropian, pasi teknika e prodhimit të pasaportave ka shkuar sipas propozimeve të dhëna nga BE-ja.

Siguria e pasaportave është e nivelit mjaft të lartë sepse të dhënat personale të shënuara në pasaportë janë të dukshme vetëm përmes rrezeve ultraviolete.

Pasaportat e shtetit të Kosovës, vlerësohen lartë edhe nga zyrtarë të minstrisë se Punëve të Brendshme në Gjermani, ata theksojnë se nuk duhet të ekzistoj asnjë lloj dyshimi dhe frike sa i përketë cilësisë së pasaportave.

Pasaportatat e reja do t’u shpërndahen të gjitha shteteve anëtare të OKB-së, kjo do të bëhet nga ministria e Punëve të Brendshme, më qëllim që ato të shohin nga afër pasaportat e reja të Republikës se Kosovës. (RTK)

Lëshimi i pasaportave fillon së shpejti

Read Full Post »

Cili është flamuri zyrtar i Kosovës?

Më 17 u shpall pavarësia e Kosovës. Po në te njëjtën ditë Kosova u bë edhe me flamur. Deri më tani ishte përdorur flamuri i Shqipërisë me shqiponjën e zezë dykrenare në sipërfaqe të kuqe.

Prej kësaj dite Kuvendi i Kosovës vendosi se Kosova do të kishte një flamur të ri që i përngjante shumë flamurit të Bashkimit Europian, njërit prej dy mbështetësve kryesor të pavarësisë së Kosovës. Flamuri i kaltër me hartën e Kosovës në mes dhe 6 yje përmbi, u përqafu shumë shpejt nga populli i Kosovës dhe menjëherë filloj të valëvitej përpara ndërtesave zyrtare.

Flamuri që u paraqit në sallën e Kuvendit të Kosovës më 17 maj, kishte një hartë të Kosovës me ngjyrën të verdhë (kosovarçe sarihtë) dhe unë por edhe gjithë të tjerët menduan se ky ishte flamuri i ardhshëm. Por kur filluam të shohim një flamur tjetër u hutuam. Në shumë raste harta e Kosovës që është pjesë e flamurit, nuk ishte më e verdhë por e artë.

Cili është flamuri zyrtar i shtetit më të ri të Europës? Këtë pyetje i kam bërë vetes disa herë dhe ende nuk kam arrit të gjejë një përgjigje të saktë.

Vendosa ti përdor ato resurse që janë në internet dhe së pari shkova te faqja në internet e kryeministrisë. Në anën e djathtë pashë stemën por edhe flamurin dhe këtu harta e Kosovës ishte e artë. Erdhe te përfundimi se flamuri zyrtar, ai i sakti, ishte ai që kishte hartën e artë. Por për të qenë krejtësisht i sigurt vendosa të kërkoj në Google edhe faqen e Kuvendit të Kosovës. U befasova. Këtu në krye të faqes ishte përdorur një stemë ku harta e Kosovës ishte e verdhë, bile e verdhë e ndezur. Deri tash e kisha parë një me hartë të artë dhe një me hartë të verdhë, kështu që e vizitova edhe faqen e presidentit dhe edhe aty stema që ishte përdorur kishte hartën e artë.

Cili flamuri është flamuri (zyrtar) i Kosovës? Kësaj pyetje do të duhet t’i përgjigjen qeveria e Kosovës, p.sh. Hajredin Kuçi që ka qenë përgjegjës për koordinimin e punës në lidhje me simbolet e shtetit të Kosovës. Le ta dinë se nuk është mirë që kanë krijuar kaq shumë konfuzion se cili është flamuri i Kosovës. Shumë po habitem se si ata vetë nuk e kanë parë se institucionet e ndryshme të Republikës së Kosovës po përdorin stema dhe flamuj të ndryshëm.

Molla e Kuqe

Read Full Post »

1.2 miliard euro donacione për Kosovën

Në Bruksel përfundoi Konferenca e Donatorëve për Kosovën. BE-ja, SHHBA-ja dhe Gjermania janë tre donatorët më të mëdhenj.

Donatorët premtuan 1.2 miliardë euro për zhvillimin e ekonomisë në Kosovë, në konferencën e donatorëve që u mbajt në Bruksel.

“Konferenca ka qenë shumë e suksesshme”, tha Pier Mirel, zyrtar i lartë i Komisionit Evropian, përgjegjës për Ballkanin.
“Ky është një sukses i jashtëzakonshëm për të ardhmen e Kosovës si shtet i sigurt, demokratik dhe shumëetnik”, tha kryeministri i Kosovës Hashim Thaçi në mbyllje të konferencës së donatorëve.

Sipas tij, qeveria e Kosovës premton se do të vazhdojë me qeverisjen e mirë dhe shtoi se “asnjëherë nuk do t’ju zhgënjejmë”.

Read Full Post »

Lëshimi i pasaportave fillon së shpejti

Lëshimi i pasaportave të reja, që do të kenë emblemën e Republikës së Kosovës, do të filloi së shpejti. Kjo bëhet e ditur nga Ministria e Brendshme në Kosove që është përgjegjëse për lëshimin e dokumenteve të reja të udhëtimit.

Ligji për dokumentet e udhëtimit u miratua më 20 shkurt të këtij viti por nuk hyri në fuqi deri sa nuk ishte në fuqi kushtetuta e re e Kosovës. Me të hyrë në fuqi Kushtetuta e Kosovës më 15 qershor, edhe ky ligj është në fuqi dhe nuk asnjë pengesë ligjore për të filluar lëshimin e dokumenteve të reja për shtetasit e Kosovës.

Sipas Ministrisë së Mbrojtjes, qytetarët e Kosovës do të mund të pajisen me pasaportat e reja më së herëti nga data 18 korrik.

Mësohet se pasaportat e reja janë duke u shtypur jashtë vendit dhe do të jenë gjysmë biometrik, diçka që e bënë më të vështirë falsifikimin tyre.

Duke u bazuar në ligjin për dokumentet, do të prodhohen katër lloje të pasaportave: pasaporta diplomatike, pasaporta zyrtare, pasaporta e zakonshme dhe dokumenti që lejon udhëtimin individual në rast të humbjes së pasaportës deri në nxjerrjen e saj.

Ndryshe nga më herët kur pasaportat ishin të vlefshme vetëm dy vite, pasaportat e reja me mbishkrimin Republika e Kosovës do të jenë të vlefshme 10 vjet.

Shumë bashkatdhetar në botën e jashtme janë të interesuar të pajisen me pasaportat e reja gjatë atyre javëve sa qëndrojnë në Kosovë, por si duket kjo do të jetë e vështirë për shkak se bashkatdhetarët do të duhet të ju drejtohen të njëjtave sportele sikurse vendasit. Me që ky është fillimi i lëshimit të dokumenteve, pritet të ketë radhë të gjata para zyrave ku do të kërkohet për pasaportë. Ministria e Brendshme nuk ka njoftuar se a është ndërmarr ndonjë masë për të lehtësuar pajisjen me pasaportë për bashkatdhetarët.

Pasaportat e reja do të mund të përdoren për udhëtime në vendet që e kanë njohur Kosovën si shtet të pavarur. Deri më tani Shqipëria është e vetmja nga fqinjët që e rrethojnë Kosovë , që ka njohur pavarësinë. Akoma nuk dihet se a do të ketë probleme për të udhëtuar për në Maqedoni me dokumentet e reja. Serbia që kundërshton fuqishëm pavarësinë e Kosovës nuk do të njohë pasaportat e lëshuar nga Republika e Kosovës.

Ligj e bënë të mundshme lëshimin e pasaportave edhe jashtë Kosovës nga përfaqësitë diplomatike të Kosovës që fillimisht do të hapen në shumë pak shtete: ShBA, Gjermani, Shqipëri, Belgjikë, Francë, Turqi, Itali, Britani të madhe dhe Zvicër. Ende nuk është bërë e ditur se kur do t’i hapin dyert këto përfaqësi.

Keqpërdorimi i pasaportës do të dënohet me gjoba nga 50 dhe deri në 1 000 euro, varësisht nga lloji i keqpërdorimit.

Ligji për dokumentet e udhëtimit

Nëse keni pyetje, kontaktoni Ministrinë për Punë të Brendhsme në këtë numër telefoni: + 381 38 200 19 088

Po e shohim se shumë lexues të faqes sonë janë të interesuar të dinë më shumë për pasaportat e reja dhe ne do të mundohemi që në ditën e ardhshme të ju njoftojmë me të rejat e fundit për këto pasaporta.

Molla e Kuqe

Read Full Post »

Bajram Rexhepi: UNMIK-u po bashkëpunon me strukturat paralele serbe

“Kuvendi i komunave serbe”, i formuar të shtunën në veri të Mitrovicës, është ilegal dhe pa kurrfarë vlere juridike, tha të hënën në takimin e Komitetit të Sigurisë në Mitrovicë, kryetari i Komunës, Bajram Rexhepi.

“Ne si Kuvend Komunal vlerësojmë se krijimi i një kuvendi të tillë nga serbët është ilegal ashtu siç kanë qenë edhe zgjedhjet që janë mbajtur në maj si dhe vetë fituesit që kanë dalë prej atyre zgjedhjeve”, theksoi Rexhepi.

Sipas tij, ai kuvend i formuar prej vetëm dy partive nuk ka kurrfarë legjitimiteti, dhe kundërshtohet edhe nga një pjesë e konsiderueshme e vetë liderëve dhe banorëve serbë në Kosovë, çka tregon se një pjesë e tyre ka filluar ta kuptoj realitetin e ri.

Read Full Post »

Serbët themelojnë kuvend ilegal në Kosovën e pavarur

Nacionalistet serbe kanë ngritur sot parlamentin serb në qytetin e ndarë të Mitrovicës në shenjë sfide të hapur ndaj shtetit të pavarur të Kosovës.

Parlamenti serb do të luftojë kundër krijimit të një tjetër shteti shqiptar në Ballkan ka thënë për agjensinë e lajmeve “Reuters” lideri i nacionalistëve serbë Marko Jaksic.

Gjithsesi parlamenti serb në Mitrovicë nuk do të ketë asnjë fuqi legjislative dhe ekzekutive, por reflekton ndarjen e thellë që ka ende në Kosovë mes shumicës shqiptare dhe pakicës serbe që pas shpalljes së pavarësisë në 17 shkurt.

Ndërkaq kanë ardhur menjëherë reagimet e para për këtë veprim të serbëve në Mitrovicë, kështu presidenti kosovar Fatmir Sejdiu e ka cilësuar destabilizues parlamentin serb, por megjithatë i ka bërë një apel shqiptarëve për të ruajtur qetësinë. “Ruani qetësinë dhe mos reagoni ndaj provokimeve”, ka qenë apeli i presidnetit Sejdiu. Edhe shefi i ri UNMIK-ut italiani Lamberto Zanier ka reaguar duke u shprehur se parlamenti serb në Kosovë do të ketë vetëm një rol simbolik. Serbët zgjodhën sot për të ngritur paralmentin e tyre pikërisht për të përkujtuar betejën për Kosovën në 28 qershor të 1389 kundër osmanëve. Ndërkaq UMNIK dhe policia kosovare kanë shtuar kontrollet në Mitrovicë për të parandaluar çdo incident të mundshëm.

Ndërkohë, përfaqësuesi i listës serbe për Kosovë, Oliver Ivanoviq, një veprim të tillë e quan të parëndësishëm sepse formohet nga partitë opozitare, ajo radikale serbe dhe Partia Demokratike e Serbisë, për qëllime të një grupi të vogël njerëzish.

“Ata do të tentojnë të gjejnë mënyrën për ndërtimin e një institucioni i cili do të kundërshtojë koalicionin e ri në Beograd. Qeveria pro evropiane në Beograd është po ashtu e ndjeshme përballë çështjes së Kosovës dhe se është e qartë se ata do të tentojnë të veprojnë si forcë opozitare, e cila do të jetë absolutisht e parëndësishme”, ka thënë Ivanoviq.

Ivanoviqi mendon se nuk duhet të merren hapa të tillë, sepse një institucion i tillë nuk do të jetë partner as i Bashkësisë Ndërkombëtare, as i institucioneve kosovare e as për qeverinë e re të koalicionit në Beograd. Ai thekson se një Kuvend i tillë do të formohet vetëm për interesat e një grupi të vogël njerëzish sa për të marrë funksione.

Zëdhënësi i UNMIK-ut, Aleksander Ivanko, ka thënë se formimi i strukturave paralele në Mitrovicë është një akt ilegal, me të cilin forcohen strukturat paralele serbe.

“Parlamenti serb është ilegal. Ai është një pjesë e një realiteti virtual, diçka që ne nuk e marrim seriozisht”, ka thënë Ivanko, duke shtuar se deklarata e këtij kuvendi, e cila hedh poshtë pavarësinë e Kosovës, nuk ndihmon në pajtimin mes shqiptarëve dhe serbëve.

“Do të ishte më e dobishme që serbët e Kosovës të mundohen që të përfshihen sa më shumë në punën e institucioneve të Kosovës, në vend se të formojnë struktura të reja paralele”, tha Ivanko. (Balkanweb, RTK, Evropa e Lirë)

Read Full Post »

Kosova në kaos juridik

Periudha e tranzicionit në Kosovë po përcillet me paqartësi juridike, ku institucionet e Kosovës, UNMIK-u, EULEX-i e ICO-ja funksionojnë në bazë të dokumenteve të ndryshme juridike. Juristët kosovarë tërheqin vërejtjen se kjo do t’i shkaktojë telashe shtetit të ri kosovar.

Kushtetuta, plani i Ahtisaarit dhe raporti i Ban Ki Moonit – janë këto tri dokumente që aktualisht institucionet vendore dhe ndërkombëtare u referohen në kryerjen e funksioneve të tyre. Juristët tërheqin vërejtjen për një situatë konfliktuoze, ku askush nuk ka autoritetin sipëror, të cilit do t‘i bindeshin mekanizmat përkatës.

UNMIK-u, që në bazë të Rezolutës 1244 ka thënë fjalën përfundimtare deri tash, ka filluar rikonfigurimin, që nënkupton se ky mision do të zvogëlohet, për t’i lëshuar vendin EULEX-it. Por, tërë ky rikonfigurim nuk merr për bazë as kushtetutën e as planin e Ahtisaarit, por vetëm raportin e sekretarit të përgjithshëm të OKB-së, Ban Ki Moon.

Read Full Post »

Hymni i Kosovës, poezi

Hymni i Kosovës

Aty po e flet nena gjuhen shqipe
Aty shendrite Hena e Dielli -po tybe
Aty s`do te kishte vuajtje edhe gazep
Po te ishin bijt e saj te lidhur me rrespekt

Aty me te vertete flamurin e mbushen “zvezdicat”
Se u harruan Bajram Currat e Shote Galicat
Aty ku minoriteti matet me grad cellxiusi
jete te gjate sdo te kete jo qebesa flamuri si Miki Mausi

Aty edhe ku meshkujt lidhen
Me kablla te perziera
E tradhetojin gjinin tjeter te bukur
Nganjehere sa rete ne hapsira

Aty eshte Kosova ime
Qe duron stuhine e duron Deboren
Aty jetojin edhe ata
Qe gjuajn gure e mshefin doren

Sabahate Byci

Read Full Post »

Serbët i djegin sanën para syve të policëve ndërkombëtar

Një grup serbësh sot ia kanë djegur sanën e tubuar në arën e tij, Skënder Rexhepit, nga fshati Suhadoll i Mitrovicës.

Drejtori për Mbrojtje dhe Shpëtim në Komunën e Mitrovicës, Ylber Durmishi, tha se ngjarja ka ndodhur pas orës 12:00, me ç’rast një grup serbësh kanë hyrë në arën e Skënder Rexhepit dhe ia kanë djegur sanën e tubuar.

Ndërsa përfaqësuesi i Suhadollit, Shefki Imeri, tha se në momentin kur Skënder Rexhepi ishte duke mbledhur sanën e kositur në arë, një serb me një motorolë në dorë ka shkuar dhe i ka thënë që të largohet prej aty. “Pasi që Rexhepi s’ka pranuar ta largohet pa e kryer punën, aty janë mbledhur rreth 15 persona të cilët ia kanë vënë flakën sanës së tubuar”. Imeri thotë se e gjithë kjo ka ndodhur para syve të policisë së UNMIK-ut, të cilët edhe pse kanë qenë në afërsi nuk kanë intervenuar fare.

RTK

Read Full Post »

Në këto shtete do të hapen ambasadat e Rep. së Kosovës

Presidenti i Kosovës, Fatmir Sejdiu, ka dekretuar sot hapjen e nëntë ambasadave dhe përfaqësive të para diplomatike të Kosovës në botë. Për fazën e parë, ambasadat do të hapen në Uashington, Bruksel, Londër, Berlin, Paris, Romë, Vjenë, Bern dhe Tiranë.

Presidenti i Kosovës, Fatmir Sejdiu, ka dekretuar sot themelimin e nëntë misioneve të para diplomatike të Kosovës në botë. Me ketë vendim, Ministria e Jashtme ngarkohet për fillimin e zbatimit të këtij vendimi.

Këshilltarja politike e ministrit të Jashtëm, Albana Beqiri, thotë se ambasadat dhe përfaqësitë e para diplomatike do të punojnë fillimisht me personel në numër të limituar. Përzgjedhja e nëntë vendeve të para është bërë në varësi nga ndikimi politik që kanë këto kryeqytete botërore në politikën kosovare dhe në atë globale.

Read Full Post »

Letra e Sejdiut dërguar Ban Ki-moonit

Shkëlqesia e Tij Ban Ki-moon
Sekretar i Përgjithshëm
Kombet e Bashkuara
Nju-Jork

I nderuari z. Sekretar i Përgjithshëm,

Pas konsultimeve dhe në pajtim me Kryetarin e Kuvendit dhe me Kryeministrin e Republikës së Kosovës, ju shkruaj për t’ju falënderuar për letrën tuaj të datës 12 qershor, me të cilën shpjegoni planin tuaj për të rikonfiguruar praninë ndërkombëtare civile në Kosovë. Siç keni vënë në dukje në letër, njohja e pavarësisë së Kosovës nga një numër i shteteve anëtare të Kombeve të Bashkuara dhe hyrja në fuqi e Kushtetutës sonë e kanë ndryshuar situatën në mënyrë përmbajtësore. Në dritën e këtyre fakteve, vlerësojmë iniciativën tuaj dhe do të punojmë ngushtë me ju në veprimet tuaja të mëtejshme.

Read Full Post »

A ka sovranitet Kosova?

Gjergj Driloni

Nuk di pse deri më sot nuk është dhënë asnjë skjarim lidhur me deklaratën për shpalljen e pavarësisë së Kosovës të cilën e (nuk)lexoi kryeministri Hashim Thaçi dhe tekstit të shkruar në këtë faqe, të cilat kanë një kontraditë shumë të madhe ndërmjet veti dhe ate në jo në cikrrime, por në gjërat , apo në terminologjinë e fjalëve përcaktuese të gjithë asaj që përmban Deklarata e shpalljes së Pavarësisë së Republikës së Kosovës. Në deklaratë është shkruar kështu:- ‘…nëpërmjet kësaj Deklarate shpallim Kosovën shtet të pavarur dhe sovran.’, kurse kur e lexon Kryeministri Thaçi thotë:-‘…nëpërmjet kësaj Deklarate shpallim Kosovën shtet të pavarur dhe demokratik.’

-Cila prej këtyre varianteve është e vërteta dhe ku qëndron lajthitja?

-Pse nuk është bërë korrigjimi ,apo rektifikimi dhe riparimi i këtij lapsus lingue , apo lapsus calami , cilido qoftë ai ?

Read Full Post »

Pavarësi plus protektorat asimetrik

Edita Tahiri, kryetare e Alternativës Demokratike të Kosovës (ADK)

Kosova deklaroi pavarësinë dhe u bë tashmë një shtet i njohur ndërkombëtarisht nga pjesa më e fuqishme e bashkësisë ndërkombëtare. SHBA-të dhe vendet kryesore të Bashkimit Evropian e më gjërë e njohtën të drejtën e Kosovës për shtetësi dhe mirëpritën ardhjen e saj në familjen botërore të shteteve. Më 15 qershor 2008 hyri në fuqi Kushtetuta e Kosovës si dokument që legjitimon vullnetin e popullit për pavarësi dhe i cili vendos bazën ligjore të një shteti ligjor, demokratik, sovran e të pavarur. Kosova hapi një kaptinë të re, atë të shtetësisë dhe të sfidave që vijnë me të. Në këtë rrugëtim Kosova do të ketë për mbështetje praninë ndërkombëtare, ushtarake e politike, me ndryshime që përkojnë me realitete të reja por edhe të kushtëzuara nga kontekstet ndërkombëtare. Definimet e reja të pranisë ndërkombëtare u bënë të qarta këto ditë pas pritjeve dhe debateve se a thua çdo të sjellin udhëzimet e Sekretarit të Përgjithshëm to OKB-së, Ban Kimun. Nga dy letra që ai dërgoi një në adresë të Prishtinës dhe një në adresë të Beogradit (dhe në mungesë të informacionit se çka përmbanë letra/dokumenti që shoqëron letrën për Prishtinën) ajo që mund të konkludohet është se statusi i ri i Kosovës është ‘pavarësi plus protektorat asimetrik’.

Read Full Post »

Turboshkombëtarizimi i Kosovës

Edhe pse Serbia (e mbështetur nga Rusia) nuk e ka pranuar Planin e Ahtisaarit, qeveria dhe institucionet e Kosovës me një nguti të pashpjegueshme dhe këmbëgulësi të verbër po vazhdojnë me miratimin e përshpejtuar të projektligjeve që dalin nga ky plan. Plani i Ahtisaarit e legalizon ndarjen etnike dhe territoriale të Kosovës përmes formës së decentralizimit që synon ta zbatojë, kurse Beogradit ia mundëson zhvillimin e strategjisë së rikolonizimit të Kosovës përmes kthimit të serbëve të ikur nga Kosova dhe vendosjes së tyre ku nuk kanë banuar më parë, pra aty ku lidhen enklavat me njëra-tjetrën.

Njëri ndër rreziqet që përmban ky Plan, e i theksuar vazhdimisht nga Lëvizja VETËVENDOSJE!, është edhe procesi i shkombëtarizimit të Kosovës. Institucionet e pushtetit dhe disa qarqe të caktuara ndërkombëtare po synojnë zhveshjen e popullit të Kosovës nga identiteti ynë kombëtar, heqjen e flamurit, paraqitjen e popullit shqiptar asgjë më shumë sesa njëri nga gjashtë bashkësitë etnike që jetojnë në Kosovë etj.

Në kuadër të kësaj fushate shkombëtarizuese, qeveria e Kosovës ka propozuar edhe ligjin për rregullimin e festave shtetërore. Ajo që është skandaloze, e patolerushme, dhe luftë e hapur kundër identitetit tonë si komb, është fakti që ky ligj heq festën e 28 Nëntorit! Ligji parasheh si festa shtetërore të gjitha festat kryesore fetare, kurse mohon festën tonë kombëtare. Ligji jorastësisht lejon atë mbi të cilën kombi fragmentohet, por ndalon festën në të cilën i gjithë kombi bashkohet. Këto përpjekje janë në kundërshtim me prirjen historike të kombit tonë për theksimin e elementeve të përbashkëta kombëtare përmbi identitetet tjera alternative jokombëtare. Projekti i shkombëtarizimit, në krye të të cilit qëndron qeveria e Kosovës, është kundër përpjekjeve të parreshtura të lëvizjeve tona kombëtare që prej 1878 e deri sot.

E gjithë kjo po bëhet që pas disa vitesh ta harrojmë identitetin tonë kombëtar. Që flamuri i kuq me shqiponjën e zezë dykrerëshe një ditë të na duket i largët e i huaj. Këta njerëz duan që të vijë një kohë kur prishtinasi, drenicaku a pejani të mos ndjejnë kurrgjë të përbashkët me tiranasin, shkodranin a vlonjatin.

Në Kosovë sot kemi një elitë politike, kuazikulturore dhe pseudointelektuale që po përpiqet ta thellojë ndarjen që i ka ndodhur kombit shqiptar më 1913. Një tragjedi tonën të përbashkët, ata po mundohen të na e paraqesin si gëzimin më të madh. Në vend që politika të bëjë hapa në drejtim të cytjes së përmirësimit të padrejtësive historike që na janë bërë, këta politikanë po mundohen të ndërtojnë diçka të re mbi tragjedinë. Por mbi tragjedinë nuk mund të ngrihet asgjë e qëndrueshme.

Lëvizja Vetëvendosje

Read Full Post »

E kemi himnin ma të mirë n’botë

Mentor Shala, Gazeta Java

Derisa e ndigjova himnin m’u rrit krenaria…tash kemi shtet mendova, kushtetutë, flamur, stemë dhe himn. E kam nji bindje t’plotë se, edhepse pa tekst, himni i Kosovës ka me i ba qytetarët e saj me u çu n’kambë në ditën e parë që kanë me e ndigjue. Ashtu qysh e pranun flamurin, stemën, kushtetutën dhe elementet tjera të shtetit, edhe ma mirë kanë me e pranu edhe himnin e shtetit të tyne. Sepse, përnime ish himn që po t’bajke me u çu e me ndejt gatitu e me shpreh respektin. E përgëzoj edhe atë djalin e Lupçit që e kish komponu edhe komisionin që kish dijtë me e përzgjedh atë propozim-himn aq reprezentues, që nuk kish qysh mos me t’pëlqy.

Si qytetar i Kosovës i falënderoj shumë edhe kompozitorin edhe komisionin që kishin ditë me na gjetë ate melodi shumë moderne dhe shumë frymëzuese.

Me nji fjalë, ishte ma i mirë se tana himnet e shteteve t’botës!

Bile për mu!

Artikullin e plotë mund ta lexoni këtu

Read Full Post »