70 % e UNMIK-ut do të largohen nga Kosova

Shefi i UNMIK-ut, Lamberto Zannier UNMIK-u thotë se do të ruajë rreth 30 përqind të numrit të punonjësve Misioni i Kombeve të Bashkuara në Kosovë paralajmëron se brenda pak ditësh do të fillojë largimin e 70 përqind të personelit. Kjo masë është pjesë e planit për ristrukurimin e UNMIK-ut, pas shpalljes së pavarësisë dhe hyrjes në fuqi të Kushtetutës së Kosovës.

Kombet e Bashkuara po planifikojnë të mbajnë në Kosovë rreth 30 përqind të personelit ndërkombëtar dhe vendor, apo rreth 600 zyrtarë, të cilët do të jenë pjesë e misionit të rikonfiguruar të UNMIK-ut. Afër 1400 zyrtarë të tjerë do të humbin shumë shpejt vendet e punës.

Zvogëlimi i personelit të Misionit të Kombeve të Bashkuara në Kosovë mund të fillojë këtë javë, ndonëse zyrtarë të UNMIK-ut nuk kanë konfirmuar ende datën e saktë.

“Nuk mund t’ua them datën e saktë, por në ditët e ardhshme ne do të fillojmë zvogëlimin e personelit ndërkombëtar dhe atij vendor, siç parashihet me planin për rikonfigurimin e UNMIK-ut”, tha për BBC-në zëdhënësi i UNMIK-ut, Alexander Ivanko.

Read Full Post »

Kosova në kaos juridik

Periudha e tranzicionit në Kosovë po përcillet me paqartësi juridike, ku institucionet e Kosovës, UNMIK-u, EULEX-i e ICO-ja funksionojnë në bazë të dokumenteve të ndryshme juridike. Juristët kosovarë tërheqin vërejtjen se kjo do t’i shkaktojë telashe shtetit të ri kosovar.

Kushtetuta, plani i Ahtisaarit dhe raporti i Ban Ki Moonit – janë këto tri dokumente që aktualisht institucionet vendore dhe ndërkombëtare u referohen në kryerjen e funksioneve të tyre. Juristët tërheqin vërejtjen për një situatë konfliktuoze, ku askush nuk ka autoritetin sipëror, të cilit do t‘i bindeshin mekanizmat përkatës.

UNMIK-u, që në bazë të Rezolutës 1244 ka thënë fjalën përfundimtare deri tash, ka filluar rikonfigurimin, që nënkupton se ky mision do të zvogëlohet, për t’i lëshuar vendin EULEX-it. Por, tërë ky rikonfigurim nuk merr për bazë as kushtetutën e as planin e Ahtisaarit, por vetëm raportin e sekretarit të përgjithshëm të OKB-së, Ban Ki Moon.

Read Full Post »

Sejdiu: Të mos krijohen iluzione se Kosova s’është e pavarur

Presidenti Sejdiu priti ambasadorin e Belgjikës në Sofje, z. Philipe Beke, i cili njëkohësisht përfaqëson vendin e tij edhe në Kosovë.

Presidenti Sejdiu e informoi ambasadorin për vendimin që ka marrë për hapjen e misionit diplomatik të Republikës së Kosovës në nivel ambasade në Bruksel, ku janë duke u zhvilluar procedurat e nevojshme.

Gjithashtu, Presidenti Sejdiu e falënderoi ambasadorin Beke për ndihmat, bashkëpunimin dhe mbështetjen e fuqishme që Belgjika i ka dhënë Kosovës në periudha të gjata.

Ndërsa, ambasadori Philipe Beke i solli Presidentit Sejdiu konsideratat e larta të lartmadhërisë, mbretit të Belgjikës, si dhe garancitë për bashkëpunim të ngushtë të mëtejshëm.

Read Full Post »

BE i ka dhënë Kosovës 2 miliard euro, 75 % i kanë marrë konsulentët

Përfaqësuesit e Delegacionit faktmbledhës të Komitetit Buxhetor të Parlamentit Evropian, pas qëndrimit dyditësh në Kosovë, thanë se është me rëndësi që të ketë një kontroll të shfrytëzimit të parave dhe transparencë për përfitimet që mund të ketë në të ardhmen Qeveria e Kosovës dhe institucionet në ndërtimin e vendit.

Kosovës i nevojitet një gjykatë funksionale e auditorëve, kanë bërë të qartë ata.

BE-ja ka investuar deri më tash rreth 2 miliardë euro në Kosovë ndërsa delegacioni i cili, gjatë vizitës, ka pasur takime të shumta ka vlerësuar se shumica e projekteve të bizneseve të vogla janë mjaftë inkurajuese, mirëpo siç u shprehën përfaqësuesit e këtij delegacioni, ka pasur edhe kritika se çka duhet të përmirësohet në të ardhmen.

Kryesuesi i këtij delegacioni, Herbert Bosch, tha se të gjitha përshtypjet do të paraqiten në raportin e përgatitur për këtë vizitë, në mënyrë që Parlamenti Evropian të informohet mbi çështjet e asistencës financiare nga vendet e BE-së.

Read Full Post »

Letra e Sejdiut dërguar Ban Ki-moonit

Shkëlqesia e Tij Ban Ki-moon
Sekretar i Përgjithshëm
Kombet e Bashkuara
Nju-Jork

I nderuari z. Sekretar i Përgjithshëm,

Pas konsultimeve dhe në pajtim me Kryetarin e Kuvendit dhe me Kryeministrin e Republikës së Kosovës, ju shkruaj për t’ju falënderuar për letrën tuaj të datës 12 qershor, me të cilën shpjegoni planin tuaj për të rikonfiguruar praninë ndërkombëtare civile në Kosovë. Siç keni vënë në dukje në letër, njohja e pavarësisë së Kosovës nga një numër i shteteve anëtare të Kombeve të Bashkuara dhe hyrja në fuqi e Kushtetutës sonë e kanë ndryshuar situatën në mënyrë përmbajtësore. Në dritën e këtyre fakteve, vlerësojmë iniciativën tuaj dhe do të punojmë ngushtë me ju në veprimet tuaja të mëtejshme.

Read Full Post »

Pavarësi plus protektorat asimetrik

Edita Tahiri, kryetare e Alternativës Demokratike të Kosovës (ADK)

Kosova deklaroi pavarësinë dhe u bë tashmë një shtet i njohur ndërkombëtarisht nga pjesa më e fuqishme e bashkësisë ndërkombëtare. SHBA-të dhe vendet kryesore të Bashkimit Evropian e më gjërë e njohtën të drejtën e Kosovës për shtetësi dhe mirëpritën ardhjen e saj në familjen botërore të shteteve. Më 15 qershor 2008 hyri në fuqi Kushtetuta e Kosovës si dokument që legjitimon vullnetin e popullit për pavarësi dhe i cili vendos bazën ligjore të një shteti ligjor, demokratik, sovran e të pavarur. Kosova hapi një kaptinë të re, atë të shtetësisë dhe të sfidave që vijnë me të. Në këtë rrugëtim Kosova do të ketë për mbështetje praninë ndërkombëtare, ushtarake e politike, me ndryshime që përkojnë me realitete të reja por edhe të kushtëzuara nga kontekstet ndërkombëtare. Definimet e reja të pranisë ndërkombëtare u bënë të qarta këto ditë pas pritjeve dhe debateve se a thua çdo të sjellin udhëzimet e Sekretarit të Përgjithshëm to OKB-së, Ban Kimun. Nga dy letra që ai dërgoi një në adresë të Prishtinës dhe një në adresë të Beogradit (dhe në mungesë të informacionit se çka përmbanë letra/dokumenti që shoqëron letrën për Prishtinën) ajo që mund të konkludohet është se statusi i ri i Kosovës është ‘pavarësi plus protektorat asimetrik’.

Read Full Post »

EULEX nuk do të vendoset në Kosovë më 15 qershor

Presidenca e Bashkimit Evropian, ka konfirmuar edhe zyrtarisht se misioni evropian nё Kosovë nuk do nisë nё afatin e përcaktuar më herët. Duke folur nё Parlamentin Evropian, ministri i Jashtёm slloven, Dimitrij Rupel, u shpreh se qëllimi i BE-sё ёshtё qё EULEX-i tё nisё me punё sa mё parё qё ёshtё e mundur dhe tё jetё i pёrfshirё nё tёrё territorin e Kosovës.

“Duket se procesi ёshtё mё i komplikuar sё qё kemi menduar fillimisht. Operacioni do të nisё tё implementohet mё vonё se ç’kemi planifikuar. Bashkimi Evropian dhe Kombet e Bashkuara po negociojnё atё qё po quhet, rikonfigurim tё misionit nё Kosovё”, ka thënë Rupel.

Kryeministri i Sllovenisё dhe kryesuesi i radhës me Bashkimin Evropian, Janez Jansha, insiston se, pavarësisht nga ngecjet, BE-ja do ta kryejë obligimin nё Kosovё, ashtu siç ka vendosur nё muajin dhjetor. Ai gjithashtu ka thёnё se tё gjithё nё BE duhet t’i përshtaten realitetit tё ri qё do të krijohet nё Kosovё, pas 15 qershorit.

Read Full Post »

Në Kosovë fillon fushata “Eja n’Evropë”

Zyra e përfaqësuesit civil ndërkombëtarë, ajo e EULEX-it dhe Komisionit Evropian në Kosovë hapën sot një fushatë me moton “Eja n’Evropë”, që do të zgjasë deri më 30 qershor të këtij viti. Fushata e cila do të zhvillohet nëpër të gjitha komunat e Kosovës synon të shpjegojë rrugën që duhet të ndjekë Kosova për anëtarësim në Bashkimin Evropian dhe për të shpjeguar përgjegjësitë e pranisë së re të këtij Bashkimi në Kosovë.

Por, përcaktimi i këtyre përgjegjësive edhe më tej është temë debatesh për shkak të kundërshtimit të Beogradit dhe Moskës zyrtare ndaj synimeve për vendosjen e misionit të ri të Bashkimit Evropian në Kosovë që do të mbikëqyrë zbatimin e vendimit për pavarësinë e vendit dhe të sistemit të policisë dhe drejtësisë.

Read Full Post »

Kosova nuk do të ketë ushtri të vetën

 

Në kushtetutën që pritet të miratohet nga Kuvendi i Kosovës gjatë këtij muaji dhe që bazohet në planin e Martti Ahtisaari nuk parashihet që Kosova të ketë ushtrinë vet, por vetëm një force sigurie.

Neni 126 i projekt-kushtetutës që tani është e hapur për konsultime publike rregullon funksionimin e asaj që pas miratimit të kushtetutës do të ketë emrin “Forca e Sigurisë e Kosovës”.

Sipas këtij neni kjo force që do të shërbej si force kombëtare e sigurisë që ka për detyrë të mbroj qytetarët e Kosovës në raste krizash, largim të mjeteve shpërthyese dhe të ofroj mbrojtje civile.

Detyrat e përmendura në këtë nen janë të njëjtat detyra që deri më tani kanë pasur Trupat Mbrojtëse të Kosovës (TMK). Shumë kanë pritur që detyrat e TMK-së me krijimin e shtetit do të rriteshin dhe afroheshin detyrave që i kanë ushtritë e mirëfillta në shtet e pavarura por si duket TMK (FSK) do të duhet të pres edhe disa vite, ndoshta edhe dhjetëvjeçare për tu shëndruar në një ushtri të mirëfilltë.

Komandanti i FSK-së parashihet të emërohet nga Presidenti i Kosovës në bazë të rekomandimit nga Qeveria.

Fqinjët por edhe një pjesë e bashkësisë ndërkombëtare kanë frikë se një Kosovë e pavarur do të sjell probleme në vendet ballkanike ku shqiptarët janë minoritet. Kjo është reflektuar në planin e Ahtisaarit që pamundëson krijimin e një ushtrie të Kosovës. Kjo ushtri do të mundësonte mbrojtjen e territorit të Kosovës nga veti populli i Kosovës dhe jo nga paqeruajtësit ndërkombëtar.

Hartuesit e kushtetutës kanë thënë se pjesët e kushtetutës që bazohen në planin e Ahtisaarit vështirë që mund të ndryshohen kurse pjesët tjera janë të ndryshueshme por ndryshimet duhet të jenë të pranueshme nga p.sh. EULEX para se të miratohen.

Ky është artikulli i dytë nga një seri artikujsh që “molla kuqe” do të ju sjell lexuesve të saj në ditët në vijim për ti informuar me përmbajtjen e projekt-Kushtetutës së Kosovës që pritet të miratohet gjatë muajit mars.

Kushtetuta e Kosovës lejon martesat brenda gjinisë së njëjtë
Projekt Kushtetuta e Kosovës (neni 1-9) publikuar nga “molla kuqe”
Projekt Kushtetuta e Kosovës (lidhje e jashtme)

TMK(foto)

Read Full Post »

Intervistë me “kryeadministratorin” e ri

Diplomati holandez që do të jetë drejtues i misionit të BE-së në Kosovë, Pieter Feith, në një intervistë me gazetën holandeze, NRC Handelsblad, thotë se ai do të ketë pushtet ekzekutiv në Kosovë që sipas tij nënkupton se ai mundet të anuloj ligjet e miratuara nga Kuvendi i Kosovës, shkarkoj zyrtarë të korruptuar dhe shpall të pavlefshme vendime të Qeverisë së Kosovës.

Këto janë disa nga pyetjet dhe përgjigjet që ai i dha gazetares Petra de Koning në intervistën e publikuar më 16. shkurt.

Misioni në Kosovë drejtohet nga Bashkimit Europian. Shqiptarët do të duhet ti drejtohen BE-së kur janë të pakënaqur me diçka, a po?

Ashtu është

Amerikanët do të vazhdojnë të jenë heronjtë e tyre

Më herët i kam thënë kryeministrit Thaçi se Kosova kurrë nuk do të bëhet shteti i 51-të i Shteteve të Bashkuara të Amerikës. Por Kosova mund të bëhet anëtare e Bashkimit Europian. Kujtimet e 1999-së do të zbehen dhe e ardhmja i takon BE-së. Ne do të duhet të sqarojmë qartë se përmisime të mëdha në kushtet e jetesës mund të vinë vetëm nga qeveria e Kosovës. Ata do të duhet të konfrontojnë korrupsionin dhe krimin e organizuar.

Cili është problemi më i madh i Kosovës?

Kosova duhet të bëhet një shtet multi-etnik. Të drejtat e minoriteteve duhet të respektohen dhe sanksionohen në ligje. Një problem tjetër i madh është edhe papunësia që arrin 44 %. Ka shumë pak iniciativa dhe është e qartë se Kosova ka qenë nën administrim të OKB-së më gjatë se sa është dashur.

Ju thoni se Kosova duhet të bëhet shtet multi-etnik por mendoni se Kosova po funksionon kështu. Serbët në Kosovë janë të frikësuar.

Mund të ndodhë se ata janë më të sigurt se sa ndjehen vet. Ushtarët e KFOR-it janë ende atje por ndenja e sigurisë nuk duhet të varet vetëm nga kjo. Duhet të kemi një bazë të natyrshme për këtë. Ne edhe kemi problemin e kthimit të refugjatëve serb në Kosovë. Ky proces po manipulohet.

Serbia po bllokon kthimin?

Po

Serbia sipas të gjitha gjasave nuk do ta bëjë këtë pas pavarësisë së Kosovës?

Si duket ashtu do të ndodhë

Brenda Kosovës pushteti juaj do të bazohet në dëshirën për anëtarësim në BE?

Unë kam pushtet ekzekutiv. Unë mund të anuloj ligjet, shkarkoj zyrtarë të korruptuar dhe shpall të pavlefshme vendimet e Qeverisë së Kosovës. Unë jam i impresionuar nga synimet e politikanëve në Kosovë. Sot apo nesër kushtetuta do të publikohet dhe kjo kushtetutë do të kontrollohet nga organizata ime para se të aprovohet nga parlamenti.

Por edha pa kompetenca të posaçme ju do të kishit autoritet?

Po, Kosova ofron një thesar me eksperiencë. E ardhmja është e kosovarëve, nuk dua që ata të kenë arsye për të mos ndihmuar shtetin e tyre të përparoj. Ne në Kosovë do të veprojmë ndryshe nga se vepruam në Bosnjë ku bashkësia ndërkombëtare ende merr vendimet e rëndësishme. Për ne është e rëndësishme të bartim përgjegjësitë.

Një ish-gjeneral francez do të drejtoj misionin e policisë dhe juristëve. Ju jeni përfaqësuesi më i lartë ndërkombëtar. Kush është shefi?

Nëse ka të bëjë me politikë unë do të jem ai që këshillon komandantin francez.

Përktheu stafi i “molla kuqe”

Read Full Post »